Një aeroplan bombardues strategjik i tipit Tu-22M3, pjesë e forcave ajrore ruse, u rrëzua të dielën gjatë një misioni rutinë stërvitor në rajonin e Irkutskut, në Siberinë lindore. Ngjarja është konfirmuar zyrtarisht nga Ministria e Mbrojtjes e Rusisë, e cila raportoi se mjeti fluturues u përplas në një zonë të pyllëzuar pranë brigjeve të lumit Angara.
Sipas njoftimeve zyrtare, të gjithë anëtarët e ekuipazhit arritën të katapultoheshin përpara se avioni të përplasej me tokën dhe kanë mbijetuar. Ministria deklaroi se nga rrëzimi nuk janë shkaktuar dëme materiale në infrastrukturën përreth apo në zonat e banuara. Po ashtu, u theksua se bombarduesi nuk mbante armatime në momentin e aksidentit.
Pamjet e shpërndara në rrjetet sociale tregojnë momentin kur avioni humbet lartësinë dhe bie në një zonë të pyllëzuar, duke lënë pas një re të madhe tymi. Autoritetet ruse nuk kanë bërë ende publike shkaqet teknike që çuan në këtë aksident, ndërsa hetimet për zbardhjen e rrethanave janë duke vijuar.
Aeroplani Tu-22M3 njihet si një nga mjetet më të rëndësishme strategjike të Rusisë, i projektuar për misione me rreze të gjatë veprimi, patrullime dhe stërvitje ushtarake.