Kërkesat e shtetasve shqiptarë për azil në vendet e Bashkimit Europian shënuan rritje në tetor 2025, pas rënies gjatë verës. Sipas të dhënave të INSTAT-it, në atë muaj u regjistruan 505 kërkesa, niveli më i lartë që nga janari. Në gusht numri ishte 315.
Pavarësisht kësaj rritjeje, për periudhën janar-tetor 2025 u regjistruan gjithsej 4345 kërkesa, me një rënie prej 29.5% krahasuar me të njëjtën periudhë të vitit 2024. Në raport me 10-mujorin e vitit 2022, kur u shënua kulmi me 11 mijë aplikime pas pandemisë, numri tani është përgjysmuar.
Vendet e preferuara
Franca mbetet destinacioni kryesor për azilkërkuesit shqiptarë për shkak të politikave sociale, e ndjekur nga Gjermania.
Rritja e lejeve të punës
Ndërsa kërkesat për azil bien, lejet e punës po bëhen forma më e preferuar e emigracionit. Sipas Eurostat-it, mesatarisht 20 mijë leje pune u dhanë në vit gjatë periudhës 2022-2024, kryesisht në Itali, Greqi e Gjermani, krahasuar me 3-4 mijë një dekadë më parë. Që nga viti 2021, Bashkimi Europian ka dhënë rreth 72 mijë leje qëndrimi të reja për punë për shqiptarët.
Numri i atyre që emigrojnë me leje pune është gati dy herë më i lartë se ai i azilkërkuesve.
Tendencat e azilit në BE
Kërkesat për azil nga shqiptarët ranë nga 15 mijë në 2022, në 11 mijë në 2023 dhe 9.3 mijë në 2024. Në tetor 2025, në të gjithë BE-në u paraqitën 62 010 aplikime të reja nga shtetas jo të BE-së, rënie e 28% nga tetori 2024 (86 470) dhe rritje e 6% nga shtatori 2025 (58 495).