Çmimet e naftës në Kosovë kanë shënuar rritje të vazhdueshme, duke arritur rreth 1.8 euro për litër. Me një konsum mesatar prej 6 deri në 7 litra për 100 kilometra, një veturë me naftë shpenzon rreth 10 deri në 12 euro karburante për këtë distancë.
Fidan Hallaqi, pronar i kompanive E-Charge dhe E-Taxi, dhe Zeqir Smajli, pronar i kompanisë DGI Kosova, e konsiderojnë veturën elektrike një zgjidhje të mirë për qytetarët e shqetësuar nga rritja e çmimeve. "Sot mund t’ua rekomandojmë qytetarëve në Kosovë të blejnë veturë elektrike, veçanërisht nëse jetojnë ose punojnë në qytetet kryesore dhe kanë qasje në mbushje të rregullt", thotë Hallaqi për REL-in. Ai shton se infrastruktura aktuale nuk është perfekte, por është e mjaftueshme për përdorim praktik të përditshëm.
Smajli shpjegon se, pavarësisht rritjes së çmimit të energjisë elektrike, kostoja e veturave elektrike mbetet dukshëm më e ulët se ajo e derivateve. Veturat elektrike konsumojnë mesatarisht 15 deri në 20 kWh për 100 kilometra, çka përkthehet në më pak se 1 euro nëse mbushja bëhet në shtëpi gjatë tarifës së ulët, ose deri në 3-4 euro në pika publike.
E-Taxi operon vetëm me taksi elektrike, E-Charge është rrjeti i parë publik i mbushjes për vetura elektrike në Kosovë, ndërsa DGI Kosova, që funksionon prej dy vitesh, importon këto automjete. Interesimi për veturat elektrike është rritur gradualisht: fillimisht nga bizneset me shpenzime të mëdha për karburante, pastaj nga qytetarët. "Sidomos në këto periudha të shtrenjtimit të derivateve është rritur edhe më shumë interesimi dhe shitja", thotë Smajli. Shumica e veturave elektrike të importuara në vitet e fundit janë të reja.