Qarkullimi në aksin rrugor Prishtinë–Pejë dhe drejt Aeroportit Ndërkombëtar Adem Jashari është zhvilluar me vështirësi mëngjesin e sotëm, 11 janar 2026, si pasojë e reshjeve të borës dhe temperaturave të ulëta.
Në këtë segment rrugor janë krijuar kolona të gjata automjetesh, ndërsa rruga paraqitet e mbuluar me borë dhe e rrëshqitshme. Drejtuesit e automjeteve janë detyruar të lëvizin me shpejtësi të reduktuar për shkak të kushteve të rënda atmosferike. Në disa raste, qytetarët janë detyruar të ecin në këmbë për të arritur në destinacion.
Autoritetet kanë bërë thirrje për kujdes të shtuar gjatë qarkullimit dhe respektim të rregullave të trafikut, veçanërisht në drejtim të aeroportit, ku fluksi i automjeteve mbetet i lartë në orët e para të ditës. Policia e Kosovës ka kërkuar nga qytetarët të respektojnë sinjalizimin rrugor dhe të përshtasin shpejtësinë e lëvizjes me kushtet aktuale të rrugës.