Sekretari i Shtetit i Shteteve të Bashkuara, Marco Rubio, ka deklaruar se administrata e presidentit Donald Trump po trajton Iranin nga një pozicion force. Në një intervistë për rrjetin Fox News, Rubio vlerësoi se autoritetet iraniane janë mësuar për dekada me radhë t’u shmangen përgjegjësive, duke praktikuar gënjeshtrën dhe shkeljen e marrëveshjeve, por se kjo qasje nuk gjen më hapësirë në marrëdhëniet me Shtetet të Bashkuara.
Sipas sekretarit amerikan, veprimet e ndërmarra nga administrata Trump kanë dobësuar aftësitë mbrojtëse të Iranit, duke dëmtuar forcën ajrore, marinën dhe infrastrukturën ushtarake të Teheranit. Rubio theksoi se megjithëse Irani posedon ende raketa dhe dronë, ai nuk gëzon më atë mburojë mbrojtëse konvencionale pas së cilës është fshehur më parë. Ai shtoi se regjimi iranian duhet të ndryshojë sjellje dhe të heqë dorë nga politikat e zgjerimit të ndikimit në rajon, duke vënë në dukje se vendet arabe të Gjirit Persik e konsiderojnë tashmë Iranin një kërcënim të menjëhershëm.
Duke iu përgjigjur pyetjeve mbi zhvillimet globale, Rubio foli edhe për luftën në Ukrainë, duke njoftuar se gjatë javëve të ardhshme do të ketë përpjekje për të rinisur bisedimet midis Rusisë dhe Ukrainës. Megjithatë, ai pranoi se palët ndajnë ende “vija të kuqe” të forta, të cilat mbeten pengesë për arritjen e një marrëveshjeje paqeje.
Sa i përket marrëdhënieve me Kinën, sekretari i Shtetit paralajmëroi se çdo konflikt, qoftë ushtarak apo ekonomik, do të ishte katastrofik për të dyja shtetet dhe për mbarë botën. Ai theksoi se menaxhimi i këtyre marrëdhënieve është një detyrë thelbësore e politikës së jashtme, duke nënvizuar se interesat kombëtare të Shteteve të Bashkuara mbeten prioritet.