Sekretari amerikan i Shtetit, Marco Rubio, u ka kërkuar aleatëve të NATO-s përgatitjen e skenarëve të emergjencës për të garantuar lirinë e lundrimit në Ngushticën e Hormuzit. Gjatë një takimi të ministrave të Jashtëm të mbajtur në Suedi, Rubio ngriti shqetësimin se Irani mund të vazhdojë kontrollin mbi këtë korridor strategjik, duke përfshirë këtu mundësinë e vendosjes së tarifave për kalimin e anijeve.
Rubio theksoi se çështja e bllokadës është një nga temat kyçe në negociatat midis Shteteve të Bashkuara dhe Iranit. Sipas tij, përkundër disa përparimeve të vogla, një marrëveshje përfunditare nuk është arritur ende. "Po sikur Irani të thotë se refuzon të hapë ngushticat, do t’i kontrollojë ato dhe do të vendosë taksa? Në atë pikë, diçka duhet bërë," u shpreh Rubio, duke shtuar se ka marrë mbështetje nga kolegët e tij për nevojën e një plani emergjent.
Sekretari amerikan sqaroi se misioni për garantimin e lundrimit nuk do të ishte domosdoshmërisht një operacion i drejtpërdrejtë i NATO-s, por do të kërkonte kontributin e vendeve anëtare të aleancës. Aktualisht, një koalicion ndërkombëtar i udhëhequr nga Franca dhe Britania e Madhe po përgatit një mision detar, i cili synon të veprojë në rast të një paqeje të qëndrueshme. Historikisht, aleatët evropianë kanë shfaqur rezerva për përdorimin e forcës për thyerjen e bllokadave pa një bazë diplomatike.
Situata në këtë zonë është rënduar gjatë tre muajve të fundit, si pasojë e konfliktit mes SHBA-së, Izraelit dhe Iranit. Përballë kërcënimeve dhe sulmeve ndaj anijeve tregtare, Shtetet e Bashkuara kanë aplikuar gjithashtu bllokadën e tyre ndaj anijeve që lidhen me portet iraniane.