Marco Rubio, Sekretari i Shtetit i SHBA-së, mbërrijti të hënën në Shën Kits dhe Nevis dhe filloi bisedimet me udhëheqësit e Karaibeve. Ata paralajmërojnë se kriza e zgjatur humanitare në Kubë mund të destabilizojë të gjithë rajonin.
Administrata e Presidentit Donald Trump ka bllokuar dërgesat e naftës në Kubë, duke rritur presionin mbi Havanën pas arrestimit të Presidentit venezuelian Nicolas Maduro, aleat i ngushtë i Kubës. Qeveria amerikane la të kuptohej se nafta venezueliane mund të rishitet dhe të dorëzohet në Kubë, me kusht që transaksioni të mos i sjellë dobi regjimit të Havanës, por popullit të ishullit.
Departamenti i Thesarit i SHBA-së njoftoi se do të zbatojë një politikë të favorshme ndaj kërkesave për rishitjen e naftës venezueliane në Kubë. Kjo masë shihet si mbështetje dhe solidaritet me popullin kubanez, në kuadër të vizitës së Rubios.
Më parë, Trump kërcënoi të vendosë tarifa për çdo vend që furnizon Kubën me naftë dhe i kërkoi udhëheqjes kubane të arrijë një marrëveshje për të shmangur përkeqësimin e krizës humanitare. SHBA premtuan së fundmi 9 milionë dollarë ndihmë humanitare për kubanezët, e cila do të shpërndahet në ishull nga Kisha Katolike.
Rubio foli në një takim me dyer të mbyllura të krerëve të shteteve dhe qeverive të Komunitetit të Karaibeve (CARICOM) dhe zhvillon kontakte dypalëshe me udhëheqës të rajonit. Çështjet kryesore janë migracioni dhe lufta kundër trafikimit të drogës.
Para mbërritjes së Rubios, kryeministri xhamajkan Andrew Holness bëri thirrje për një përgjigje kolektive të CARICOM-it ndaj krizës në Kubë, e cila nuk është anëtare, por mban lidhje me Komunitetin. Kuba prej vitesh dërgon mjekë dhe mësues në vendet fqinje. Uashingtoni bën presion këtyre vendeve për të ndaluar pjesëmarrjen në programin kubanez të dërgimit të mjekëve, burim valutor për Havanën.
Përditësime
Autoritetet arrestuan Nicolás Maduro-n më 3 janar.