Rumen Radev u betua si kryeministër i Bullgarisë

Rumen Radev mori sot mandatin për formimin e qeverisë së re në Bullgari nga presidentja Iliana Yotova, pas fitores së partisë së tij Bullgaria Progresive në zgjedhjet parlamentare të 19 prillit. Partia siguroi 44.6% të votave dhe shumicën në parlamentin me 240 deputetë, duke mundësuar qeverinë e parë njëpartiake pas gati tre dekadash.

Kjo fitore përfundoi një periudhë paqëndrueshmërie politike me tetë procese zgjedhore brenda pesë vitesh. Radev, ish-pilot luftarak dhe euro-skeptik, dha dorëheqjen në janar nga posti i presidentit për të kandiduar në zgjedhje, pas rrëzimit të qeverisë së mëparshme nga protestat kundër korrupsionit dhe rritjes së kostos së jetesës.

Pas marrjes së mandatit, Radev prezantoi kabinetin e propozuar, ku vetë ai do të jetë kryeministër. Zv/kryeministrat përfshijnë Galab Donev (ministër i Financave), Aleksandar Pulev (ministër i Ekonomisë, Investimeve dhe Industrisë), Ivo Petrov dhe Atanas Pekanov. Ministra të tjerë janë Ivan Demerdzhiev (Brendshëm), Dimitar Stoyanov (Mbrojtje), Velislava Petrova-Chamova (Jashtme) dhe Nikolay Naydenov (Drejtësi).

Në deklaratat e tij, Radev premtoi ulje të çmimeve, stabilitet ekonomik, reforma në gjyqësor dhe miratim të shpejtë të buxhetit të ri për të siguruar pagesat e pensioneve dhe pagave. Qeveria do të kërkojë rikuperimin e fondeve të planit të rimëkëmbjes të BE-së, të vonuara për shkak të reformave të papërmbushura në drejtësi dhe luftës kundër korrupsionit.

Analistët dhe diplomatët ndjekin me vëmendje politikën e jashtme të qeverisë së re për shkak të shqetësimeve për afrim me Rusinë. Zyrtarët e Bullgaria Progresive i kanë mohuar këto frikëra, duke theksuar se politika e jashtme nuk do të ndryshojë në mënyrë të konsiderueshme. Kabineti pritet të marrë votëbesimin në parlament nesër.