Rusia dhe Ukraina kanë shkëmbyer mbetjet e trupave të ushtarëve. Sipas Vladimir Medinsky-t, ndihmës i lartë i Presidentit rus Vladimir Putin, Rusia dorëzoi Ukrainës mbetjet e 1.000 ushtarëve dhe mori në këmbim trupat e 35 ushtarëve rusë. Njoftimi u bë në Telegram bashkë me një foto që tregon trupat duke u shkarkuar nga një kamion.
Ukraina konfirmoi se ka marrë 1.000 trupa, të cilat, sipas informacioneve paraprake nga pala ruse, mund t'u përkasin mbrojtësve ukrainas. Ky shkëmbim bazohet në marrëveshjen e arritur gjatë negociatave në Stamboll në qershor 2025. Palët ranë dakord të kthejnë mbetjet e deri në 6.000 ushtarëve secila, si dhe të gjithë të burgosurit e luftës të sëmurë dhe të plagosur rëndë, e ata nën moshën 25 vjeç.
Ndërkohë, kryenegociatori ukrainas u takua në Gjenevë me dërguarit e Presidentit të SHBA-së Donald Trump për të diskutuar planet ekonomike për rindërtimin e Ukrainës pas luftës. Negociatorët po përgatitin raundin e tretë të bisedimeve të udhëhequra nga SHBA-të, një takim trepalësh që përfshin edhe Rusinë, me synim dhënien fund konfliktit në vitin e tij të pestë.
Pak orë para bisedimeve në Gjenevë, Rusia lëshoi 420 dronë dhe 39 raketa në gjashtë rajone të Ukrainës, duke plagosur dhjetëra njerëz, sipas Presidentit ukrainas Volodymyr Zelensky. Të dyja palët kanë shkëmbyer mijëra mbetje trupash gjatë konfliktit që filloi më 24 shkurt 2022 me pushtimin e plotë rus të Ukrainës.