Një fabrikë për prodhimin e dronëve në Kiev është shkatërruar si pasojë e një goditjeje nga një raketë balistike ruse. Objekti i përkiste kompanisë Terminal Autonomy, e cila është e regjistruar si korporatë amerikane në shtetin e Delaware.
Sipas të dhënave, kjo kompani prodhon dronë precizë me rreze të gjatë veprimi, të pajisur me sisteme udhëzimi që janë rezistente ndaj ndërhyrjeve elektronike të forcave ruse. Termi “autonomi terminale” përshkruan fazën përfundimtare të sulmit të një droni kamikaz, ku inteligjenca artificiale merr kontrollin e armës në rastet kur forcat mbrojtëse bllokojnë valët e radios ose rrjetet celulare. Një burim i njohur me kompaninë ka konfirmuar se nga ky sulm nuk ka pasur viktima.
Ish-zyrtari i lartë i inteligjencës amerikane, Anthony Vinci, deklaroi se për Rusinë ky objekt mbetet një objektiv legjitim, pavarësisht pronësisë së tij. Ai theksoi se për forcat ruse nuk ka rëndësi nëse objekti është amerikan apo i ndonjë pale tjetër.
Agjencia shtetërore ruse e lajmeve, TASS, duke iu referuar Ministrisë ruse të Mbrojtjes, raportoi për sulmin të dielën. Në raportin rus nuk u specifikua pronësia amerikane e fabrikës, por u bë e ditur se në ambientet e saj kishin punuar specialistë nga një kompani ukrainase-amerikane.
Ngjarja vjen në një periudhë tensionesh të shtuara. Në fillim të muajit korrik, presidenti amerikan Donald Trump bëri të ditur se Shtetet e Bashkuara do t’i akordonin Ukrainës licencën për prodhimin e raketave kundërajrore Patriot.