Ish-ministri i Brendshëm, Saimir Tahiri, ka njoftuar rikthimin e tij në vëmendjen publike përmes një mesazhi enigmatik në rrjetet sociale. Ai ka publikuar një video ku shfaqet në një ambient xhirimi, duke u shoqëruar nga teksti: “Disa histori i kam jetuar. Disa të tjera i kam dëgjuar të tregohen për mua. Do shihemi së shpejti. Ka kaq shumë për të thënë”.
Sipas burimeve të shumta, projekti në fjalë është një prodhim multimedial që po përgatitet në bashkëpunim me median Zëri. Ky dokumentar pritet të hedhë dritë mbi periudhën kur Tahiri mbante detyrën e ministrit të Brendshëm, duke përfshirë dëshmi nga persona që kanë qenë pjesë e ngjarjeve të asaj kohe. Qëllimi është rindërtimi i episodeve të njohura dhe më pak të njohura për publikun, përmes kujtimeve dhe materialeve të kohës.
Në sfondin e këtij paralajmërimi, kanë qarkulluar zëra për një afrim të mundshëm të Tahirit me eksponentë të Partisë Socialiste, ndërsa vetë ai është rikthyer të jetë aktiv në rrjetet sociale pas një periudhe të gjatë me profil të ulët. Çështja e tij penale vijon të jetë objekt diskutimi, pasi ish-ministri u dënua në shkurt të vitit 2022 me 3 vite e 4 muaj burgim për veprën penale të “shpërdorimit të detyrës”, dënim të cilin e përfundoi pas një periudhe të kaluar në qeli dhe arrest shtëpie.