Kryetari i Partisë Demokratike, Sali Berisha, gjatë fjalës së tij në konferencën e Partisë Popullore Europiane (EPP) që po zhvillohet në Sarajevë, e përshkroi situatën në Shqipëri si një krizë të rëndë politike, institucionale dhe shoqërore, duke e krahasuar vendin me një pacient në sallën e urgjencës.
Sali Berisha deklaroi se problemi kryesor mbetet mungesa e zgjedhjeve të lira dhe të ndershme, të cilat ai i cilësoi si farsë e dokumentuar nga institucionet ndërkombëtare. Ai ritheksoi nevojën për një qeveri kujdestare, e cila sipas tij do të ishte zgjidhja për të garantuar standarde demokratike dhe për të shmangur degradimin e mëtejshëm të situatës.
Lideri i opozitës u shpreh se vendi po përballet me protesta masive, të cilat nuk përfaqësojnë vetëm një forcë politike, por janë një reagim i gjerë qytetar. Ai theksoi mbështetjen për lëvizjet qytetare, përfshirë ato kundër investimeve në Zvërnec, dhe nënvizoi se lëvizja është e pandalshme. Berisha akuzoi qeverinë e kryeministrit Edi Rama për qasje cinike ndaj këtyre protestave dhe paralajmëroi se mosgjetja e një zgjidhjeje paqësore mund të çojë në përplasje serioze apo regres të vendit.