Kryetari i Partisë Demokratike, Sali Berisha, pritet të udhëtojë së shpejti drejt Shteteve të Bashkuara. Njoftimi është bërë nga deputetja demokrate, Ina Zhupa, gjatë një interviste për televizionin A2 CNN.
Sipas Zhupës, heqja e statusit që më herët pengonte lëvizjen e Berishës drejt SHBA-së është një moment i rëndësishëm moral dhe politik, si për drejtuesin e opozitës, ashtu edhe për mbështetësit e Partisë Demokratike. Ajo e cilësoi këtë si një betejë të fituar për 500 mijë votuesit që mbështetën këtë forcë politike.
Deputetja deklaroi se Sali Berisha tashmë ka mundësinë të udhëtojë lirisht dhe të zhvillojë takime me përfaqësues të lartë të administratës amerikane. Ajo nënvizoi gjithashtu se ky zhvillim dëshmon që opozita shqiptare mbetet e angazhuar ndaj parimeve të saj dhe nuk ka qenë asnjëherë në kundërshtim me interesat e Shteteve të Bashkuara.