Kryetari i Partisë Demokratike, Sali Berisha, ka publikuar në rrjetet sociale pamje të kryeministrit Edi Rama, i cili ndodhet për pushime verore në bregdetin e Dhërmiut. Në videon e shpërndarë, kreu i qeverisë shfaqet duke udhëtuar me një mjet lundrues të tipit skaf.
Nëpërmjet një komenti në rrjetin social Facebook, Berisha ka ngritur pyetjen: "A është edhe ky skaf i Beqirit?". Ky reagim i liderit demokrat vjen në një kohë kur biznesmeni Ermal Beqiri është arrestuar pak ditë më parë në Francë, pasi ishte shpallur në kërkim nga SPAK në kuadër të hetimeve për aferën e AKSHI-t.
Sipas informacioneve, në emër të Ermal Beqirit dyshohet se figurojnë pasuri të konsiderueshme në Francë, përfshirë kështjellën "Château d’Auteuil", apartamente, llogari bankare, si dhe mjete si avion privat dhe jaht. Përmes këtij reagimi, Sali Berisha ka vijuar akuzat ndaj kryeministrit dhe rrethit të tij, duke kërkuar transparencë në lidhje me pronësinë e mjetit lundrues të përdorur nga Rama gjatë pushimeve të tij.