Kryetari i Partisë Demokratike, Sali Berisha, ka vijuar vizitën e tij në Shtetet e Bashkuara të Amerikës me një takim me përfaqësues të komunitetit shqiptaro-amerikan në Teksas. Gjatë këtij takimi, Berisha zhvilloi një bashkëbisedim me shqiptarët që jetojnë dhe punojnë në këtë shtet, duke vlerësuar pjesëmarrjen dhe mikpritjen e tyre.
Nëpërmjet një postimi në rrjetet sociale, lideri i opozitës shprehu mirënjohjen për pjesëmarrësit, duke e cilësuar takimin si një moment të veçantë. “Falënderim të përzemërt për këtë takim të shkëlqyer me komunitetin shqiptaro-amerikan në Texas!”, shkroi Berisha.
Vizita e Berishës në SHBA përfshin një sërë kontaktesh me komunitetin shqiptar, si dhe takime me përfaqësues të politikës amerikane. Programi i tij përkon me pjesëmarrjen në aktivitete të lidhura me zgjedhjet midterm të Partisë Republikane. Këto takime shërbejnë si një mundësi për të diskutuar mbi zhvillimet aktuale politike në Shqipëri dhe për forcimin e marrëdhënieve dypalëshe midis Shqipërisë dhe Shteteve të Bashkuara.
Përditësime
Kryebashkiaku i Mesquite, Daniel Aleman Jr., ka nderuar Sali Berishën me Çelësin e Qytetit gjatë vizitës së tij në Teksas. Në kuadër të kësaj vizite, Berisha ka zhvilluar takime politike me figura të njohura republikane, përfshirë Ken Paxton, Pete Sessions, Joe Gruters dhe Ed Martin. Në këto takime ka qenë i pranishëm edhe deputeti Fatmir Mediu.