Ervin Salianji, ish-deputet i Partisë Demokratike, u shpreh në emisionin “Kjo Javë” të News 24 se nuk ndodhet në fazë gare personale për kreun e partisë kundër Sali Berishës.
I pyetur për mundësinë e kandidimit në zgjedhjet e brendshme, Salianji theksoi se po diskuton dhe mbledh shqetësimet e demokratëve në mbarë vendin. Ai ka nisur një lëvizje me ta, ndonëse lidershipi aktual e ka cilësuar si “të vetëpërjashtuar”.
“Unë jam në fazën ku po diskutoj dhe mbledh shqetësimet e demokratëve. Do të jetë një etapë tjetër ku do të ketë propozime konkrete për rrugën e zgjidhjes. Kjo nuk është një fazë në të cilën ka një garë dhe shpreh një ambicie”, tha ai.
Sipas Salianjit, synimi kryesor është rikthimi i Partisë Demokratike si forcë fituese. “Në këtë fazë dua që PD të jetë fituese. Lëvizja jonë, por edhe mendimi im është se do të bëjmë gjithçka që PD të jetë fituese. Brenda kësaj nuk përjashtoj asgjë që do të thonë demokratët. Duhet të gjejmë çdo rrugë, idetë më të mira që të bëjmë PD”, u shpreh ish-deputeti.
Ai përsëriti se vendimet për të ardhmen duhet të burojnë nga baza e partisë dhe idetë më të mira për ringritjen e saj.