Sipas revistës së specializuar për udhëtime Travel Off Path, qyteti i Sarandës është pozicionuar në krye të listës së destinacioneve bregdetare më ekonomike në Evropë për sezonin veror të vitit 2026. Ky vlerësim thekson se, përkundër rritjes së fluksit të turistëve ndërkombëtarë që e kanë bërë këtë zonë të krahasueshme me destinacione si ato në Itali apo Kroaci, bregdeti shqiptar vijon të ofrojë një raport të favorshëm mes cilësisë së shërbimeve dhe kostos.
Analiza e publikuar nxjerr në pah çmime të përballueshme për vizitorët:
• Paketa e plazhit (një çadër dhe dy shezlongë): rreth 10 dollarë.
• Shpenzimet për ushqim: një sanduiç kushton rreth 5 dollarë, ndërsa një vakt me tri pjata për dy persona në restorante mesatare varion nga 40 deri në 55 dollarë.
• Akomodimi: hotelet ekonomike dhe bujtinat ofrojnë dhoma për rreth 20 dollarë nata, ndërsa strukturat luksoze buzë detit kushtojnë mesatarisht 120 dollarë nata.
Krahas plazheve si ai i Ksamilit, të cilat krahasohen shpesh me zonat tropikale për shkak të rërës së bardhë dhe ujërave të pastra, artikulli vë në dukje rëndësinë e vlerave historike të zonës, ku spikat Parku Kombëtar i Butrintit si një pikë kyçe tërheqëse për vizitorët.