Policia e Sarandës ka identifikuar dhe shpallur në kërkim tre persona, të cilët dyshohen se kanë ushtruar dhunë ndaj oficerit të policisë, Mihal Velço. Ngjarja ka ndodhur mbrëmjen e së enjtes, rreth orës 23:00, në lagjen nr. 4 të qytetit bregdetar.
Sipas hetimeve paraprake, konflikti nisi pasi oficeri, i cili ishte duke lëvizur në qytet, u kërkoi tre personave që lëviznin me motomjete të ndalonin manovrat e rrezikshme. Pasi oficeri u prezantua si punonjës policie, personat e dyshuar e kanë fyer, goditur dhe kanosur me thikë, përpara se të largoheshin nga vendngjarja.
Identifikimi i të dyshuarve, Andrea Rubati, Antonio Lefteri dhe Engjëll Dalanaj, u bë i mundur nëpërmjet administrimit të pamjeve të kamerave të sigurisë. Të tre personat rezultojnë me precedentë të mëparshëm penalë. Aktualisht, ndaj tyre rëndojnë akuzat për veprat penale "Goditja për shkak të detyrës" dhe "Kanosja", parashikuar nga nenet 237 dhe 84 të Kodit Penal.
Autoritetet policore kanë zhvilluar një sërë kontrollesh në banesat e të dyshuarve, përfshirë ato në rrugët "Mithat Hoxha", "Skënderbej" dhe "Onhezmi", si dhe në banesën e gjyshit të Andrea Rubatit në fshatin Livadhja të bashkisë Finiq. Megjithatë, deri në këto momente, personat nuk janë lokalizuar dhe operacioni për kapjen e tyre vijon.
Ky rast shënohet në një kohë kur emri i Andrea Rubatit është përmendur në raportimet për një atentat të ndodhur ndaj babait të tij, shtetasit Thimjo Rubati. Ndërkohë, oficeri Mihal Velço ka depozituar kallëzim penal pranë Prokurorisë së Juridiksionit të Përgjithshëm Sarandë.