Sot në orën 09:30, 21 qytetarë të ndaluar nga autoritetet pas protestës së zhvilluar më 2 korrik para ndërtesës së Kuvendit, kanë dalë para Gjykatës së Tiranës. Seanca gjyqësore është përqendruar në vlerësimin e ligjshmërisë së arrestimit dhe caktimin e masave të sigurisë.
Në mbështetje të të ndaluarve, një Grup Koordinues dhe qytetarë janë mbledhur para godinës së gjykatës, duke kërkuar lirimin e tyre. Tensionet lidhur me këto arrestime janë shfaqur edhe mbrëmjen e kaluar, kur një grup protestuesish u përplas me forcat e policisë pranë Komisariatit nr. 3 në rrugën “Mine Peza”. Gjatë këtij incidenti, persona të maskuar përdorën gurë e shkopinj, duke dëmtuar xhamat dhe derën hyrëse të komisariatit, ndërsa disa prej tyre arritën të depërtojnë përkohësisht në ambientet e brendshme.
Sipas dokumenteve gjyqësore, 21 të arrestuarit akuzohen për 7 vepra penale:
- Shkatërrim prone;
- Kundërshtim i punonjësit të policisë;
- Goditje për shkak të detyrës;
- Prishje e rendit dhe qetësisë publike;
- Organizim dhe pjesëmarrje në grumbullime të paligjshme;
- Mosbindje ndaj urdhrit të policisë;
- Pengim i qarkullimit të mjeteve.
Ndër personat e ndaluar figurojnë: Kujtim Pervataj, Romario Dushi, Ardit Ymaj, Niko Qarkaj, Ylli Shima, Ervis Gjoni, Frrok Bardhi, Rezart Pirani, Admir Tershalla, Alban Nikolli, Elvis Bici, Altin Hila, Ervin Gega, Arben Lleshaj, Everes Bardhi, Besard Kajmi, Aristotel Elezaj, Gentjan Progni dhe Durim Bami. Gjatë protestës së 2 korrikut, autoritetet raportuan përdorimin e gazit lotsjellës dhe ujit me presion për shpërndarjen e turmës, pas hedhjes së sendeve të forta ndaj forcave të rendit.