Analisti Dardan Sejdiu, në një prononcim për emisionin "Rubikon", ka analizuar takimin e paralajmëruar ndërmjet kryeministrit Albin Kurti dhe përfaqësuesve të partive opozitare. Sipas tij, fokusi i vetëm i këtij takimi do të jetë gjetja e një konsensusi për zgjedhjen e presidentit të vendit.
Sejdiu theksoi se në këtë takim nuk pritet të zhvillohen diskutime mbi parimet programore, duke e vlerësuar qeverisjen aktuale si një projekt që fokusohet kryesisht te mbajtja e pushtetit. "Tema është shumë e thjeshtë: a jeni të interesuar që unë t'ju jap dy ose tri pozita në Qeveri, e ju të votoni dikë që është i pavarur për president? Që këtu fillon dhe mbaron diskutimi", deklaroi ai.
Sipas vlerësimit të analistit, ky diskutim përqendrohet te sigurimi i një balance dhe stabiliteti institucional. Ai shtoi se presidenti duhet të jetë figurë e pavarur, duke lënë të kuptohet se zgjedhja e tij kërkon bashkëpunim të gjerë midis forcave politike.