Gent Sejko, guvernator i Bankës së Shqipërisë, dhe Petrit Malaj, ministër i Financave, morën pjesë në Mbledhjet e Pranverës 2026 të Fondit Monetar Ndërkombëtar (FMN) dhe Bankës Botërore (BB) në Uashington, D.C., në datat 16-18 prill 2026.
Shqipëria u përfaqësua me një delegacion të përbashkët, që përfshinte, nga Banka e Shqipërisë, zëvendësguvernatoren e parë Holta Zaçaj dhe drejtues të tjerë, si dhe nga Ministria e Financave, zëvendë ministrin Endrit Yzeiraj dhe drejtues të tjerë.
Takimi me dyer të mbyllura
Në një takim të organizuar nga Departamenti Evropian i FMN-së, morën pjesë ministrat e financave dhe guvernatorët e bankave qendrore të vendeve të Evropës Qendrore, Lindore dhe Juglindore. Diskutimet u përqendruan në perspektivat ekonomike dhe sfidat e politikave në një mjedis me pasiguri gjeopolitike të larta dhe presione inflacioniste.
Në fjalën e tij, Sejko theksoi tre mesazhe kryesore:
- Shqipëria ndodhet në një pozicion më të fortë ekonomik falë përmirësimit të qëndrueshmërisë makroekonomike, stabilitetit financiar dhe reformave strukturore të dekadës së fundit.
- Nevojitet vigjilencë dhe reagim i kujdesshëm ndaj zhvillimeve të reja për të ruajtur stabilitetin e çmimeve.
- Rëndësia e koordinimit ndërkombëtar përmes forcimit të dialogut dhe harmonizimit të politikave në një ekonomi të ndërlidhur.
Ai nënvizoi se stabiliteti makroekonomik është një investim afatgjatë që kërkon angazhim të vazhdueshëm.
Takime bilaterale
Sejko zhvilloi takime me zyrtarë të lartë:
- Drejtorin Ekzekutiv për Shqipërinë në FMN, Riccardo Ercoli.
- Drejtorin e Departamentit Evropian në FMN, Alfred Kammer.
- Asistentedrejtoren e Departamentit të Tregjeve Kapitale dhe Monetare, Mary Goodman.
- Shefin e Misionit të FMN-së, Diego Cerdeiro.
- Zëvendëspresidenten për Evropën dhe Azinë Qendrore në BB, Antonella Bassani.
- Drejtorin Ekzekutiv për Shqipërinë në BB, Matteo Bugamelli.
- Drejtoren Rajonale për Ballkanin Perëndimor në BB, Xiaoqing Yu.
Në këto takime u diskutuan zhvillimet makroekonomike, politikat dhe sektori bankar në Shqipëri. Ekonomia tregon ecuri pozitive me rritje të aktivitetit, punësimit dhe pagave. Inflacioni është në nivele të ulëta dhe pritet të kthehet drejt objektivit në 2026. Sektori bankar karakterizohet nga stabilitet, likuiditet i lartë dhe rritje e kreditimit për sektorin privat.