Gjatë raportimit në Komisionin për Nismat Qytetare, guvernatori i Bankës së Shqipërisë, Gent Sejko, vlerësoi se ruajtja e kursit të lirë të këmbimit mbetet e domosdoshme për stabilitetin e ekonomisë. Ai paralajmëroi se, nëse kursi do të fiksohej, ekonomia do të përballej me pasoja negative, ku ndër më të rëndësishmet do të ishte rritja e inflacionit nga mesatarja aktuale prej 2.2% në 6-7%.
Sipas Sejkos, ndryshimi i politikës së kursit do të sillte rritje të normës bazë të interesit nga 2.5% në 6%, çka do të shtrenjtonte ndjeshëm këstet e kredive. Ky skenar parashikohet të rriste nivelin e kredisë me probleme nga 3.8% në mbi 10%.
Guvernatori shpjegoi se forcimi i monedhës kombëtare ndaj valutave të huaja, ku euro këmbehet me 93 lekë dhe dollari me 82 lekë, ka ardhur si pasojë e fluksit të shtuar të valutës nga:
- Të ardhurat nga turizmi
- Remitancat
- Investimet e huaja direkte
- Të ardhurat nga puna
- Përmirësimi i pozicionit të jashtëm të ekonomisë
Në lidhje me rekomandimet e Kuvendit për sektorin e pasurive të paluajtshme, Banka e Shqipërisë ka forcuar monitorimin e të dhënave për kreditë e banesave, pronat tregtare, ndërtuesit dhe projektet imobiliare. Ndonëse aktualisht nuk ka sinjale për krizë, institucioni vlerëson se rritja e shpejtë e çmimeve të pronave mbart rreziqe për stabilitetin financiar. Gjithashtu, banka po ndjek me kujdes ekspozimet ndaj kredimarrësve të mëdhenj dhe projekteve të mëdha infrastrukturore.