Sektori bankar shqiptar ka rritur investimet në Eurobondet e qeverisë shqiptare gjatë vitit 2025. Të dhënat e Bankës së Shqipërisë tregojnë se letrat me vlerë në valutë të huaj të qeverisë në bilancin e sektorit bankar arritën 103.2 miliardë lekë ose 1.07 miliardë euro në fund të vitit, me kursin e ditës së fundit.
Krahasuar me fundin e vitit 2024, vlera e këtyre aseteve u rrit me 11.5%. Nëse hiqet efekti i kursit të këmbimit, rritja rezulton edhe më e lartë.
Kursi i këmbimit
Kursi euro-lek e mbylli vitin 2025 në nivelin 96.77 lekë për euro, kursi më i ulët historik në fund të vitit kalendarik dhe afër minimumit absolut prej 96.46 lekësh, regjistruar një javë më parë. Krahasuar me fundin e 2024-ës, kursi ra me 1.4%.
Pesha në bilanc
Pesha e Eurobondeve të qeverisë shqiptare në bilancin e sektorit bankar u rrit lehtë në 4.4% të aktiveve, nga 4.3% një vit më parë. Ekspozimi total ndaj qeverisë, duke përfshirë letrat e borxhit në lekë, përbënte 26.9% të aktiveve totale, në rënie nga 27.1% në fund të 2024-ës.
Arsyet e rritjes
Instrumentet e borxhit në valutë kanë tërhequr interes në rritje nga sektori bankar në vitet e fundit, falë kthimeve të kënaqshme në një periudhë me norma interesi të ulëta për euron. Banka e Shqipërisë ka mundësuar kushte lehtësuese të përkohshme për investimet në Eurobonde të disa emetimeve, duke lejuar ponderimin e tyre me koeficient rreziku më të ulët se standardet rregullatore, për llogaritjen e mjaftueshmërisë së kapitalit.