Marina meksikane ka zhvilluar një operacion të suksesshëm kundër trafikut ndërkombëtar të drogës në ujërat e Oqeanit Paqësor. Aksioni, i cili u përqendrua pranë shtetit Oaxaca, erdhi si rezultat i patrullimeve të intensifikuara detare dhe ajrore në pjesën jugore të vendit.
Gjatë ndërhyrjes, forcat detare ndaluan dy mjete lundruese në të cilat u gjetën 86 pako me kokainë, që peshonin gjithsej rreth 3 ton. Përveç lëndës narkotike, në anije u gjetën edhe 20 bidona që përmbanin rreth 1 mijë litra karburant. Katër personat që ndodheshin në bordin e mjeteve lundruese u arrestuan në vendngjarje.
Sipas njoftimit të autoriteteve, ky operacion është pjesë e një strategjie të shtuar të Meksikës për të goditur kartelet e narkotikëve dhe rrjetet e kontrabandës, pas presionit të vazhdueshëm nga Shtetet e Bashkuara të Amerikës. Marina vlerëson se ky sekuestrim ka goditur rëndë logjistikën dhe kapacitetet financiare të krimit të organizuar, duke pamundësuar shpërndarjen e drogës me vlerë prej 37 milionë dollarësh në tregun ilegal. Ky aksion cilësohet si një nga ndërhyrjet më të rëndësishme të kryera në rajon kohët e fundit.
Përditësime
Autoritetet meksikane njoftuan sekuestrimin e 2.99 tonëve kokainë dhe arrestimin e katër personave. Burime diplomatike bëjnë me dije se operacioni është rezultat i presionit të shtuar të administratës së Donald Trump ndaj qeverisë së presidentes Claudia Sheinbaum për intensifikimin e luftës kundër karteleve të drogës.