Policia e Durrësit, në bashkëpunim me Komisariatin e Policisë Shijak, organizoi dhe finalizoi operacionin e koduar “River”, ku arrestoi në flagrancë shtetasin Sh. V., 59 vjeç, banues në Shijak.
Ai dyshohet për veprat penale "Trafikimi i armëve dhe i municionit", "Mbajtja pa leje dhe prodhimi i armëve, armëve shpërthyese dhe i municionit", "Prodhimi, mbajtja, blerja apo shitja pa leje e armëve të ftohta" si dhe "Prodhimi dhe shitja e narkotikëve".
Gjatë kontrollit në banesën e tij, policia gjeti dhe sekuestroi në cilësinë e provës materiale:
- 2 armë zjarri pistoletë me krehra me fishekë;
- 3 armë gjahu;
- municion luftarak i kalibrave të ndryshëm dhe pjesë armësh;
- 3 palë dylbi (një prej tyre për armë);
- 1 dron;
- 8 armë të ftohta (thika);
- 24 doza të lëndës së dyshuar narkotike kokainë;
- 1 peshore elektronike;
- 6 celularë.
Nga hetimet paraprake, dyshohet se 59-vjeçari i trafikonte armët me qëllim shitjen në zonën e Shijakut.
Vijon puna për dokumentimin e veprimtarisë kriminale të këtij shtetasi dhe identifikimin e personave të tjerë të përfshirë. Materialet procedurale iu referuan Prokurorisë së Durrësit për veprime të mëtejshme.