Ngjarja ka ndodhur në orët e para të datës 1 shtator 2026, rreth orës 00:30, në një restorant në fshatin Balaj të Ferizajt. Pas marrjes së informatës për të shtëna me armë, në vendin e ngjarjes kanë dalë njësitet reaguese të policisë, të shoqëruara nga njësiti i hetimeve dhe ai i forenzikës. Gjatë ekzaminimit të vendit, autoritetet kanë gjetur dhe sekuestruar 39 gëzhoja të armëve me gaz.
Në kuadër të veprimeve hetimore, policia ka intervistuar dëshmitarë dhe ka siguruar video-incizime të ahengut. Analizimi i këtyre provave ka bërë të mundur identifikimin e dy të dyshuarve, R.L., 27 vjeç, dhe SH.M., 35 vjeç. Policia ka sekuestruar gjithsej dy armë me gaz që dyshohet se janë përdorur në këtë rast.
Ndaj dy të dyshuarve janë iniciuar procedurat ligjore si më poshtë:
• R.L. (27 vjeç): është iniciuar rast për veprën penale "Përdorimi i armës apo mjetit të rrezikshëm".
• SH.M. (35 vjeç): janë iniciuar rastet për veprat penale "Mbajtja në pronësi, kontroll ose posedim të paautorizuar të armëve" dhe "Përdorimi i armës apo mjetit të rrezikshëm".
Me vendim të prokurorit të shtetit, të dyshuarit janë liruar dhe rasti do të vazhdojë të hetohet në procedurë të rregullt.