Policia e Kosovës ka realizuar një operacion në komunën e Zubin Potokut në kuadër të hetimeve për kanosjen e ministrit të Punëve të Brendshme, Xhelal Sveçla, të ndodhur ditë më parë.
Gjatë bastisjeve në dy lokacione të ndryshme, forcat e rendit kanë gjetur dhe sekuestruar gjithsej 4 armë të gjata të llojeve të ndryshme:
- Në njërin lokacion janë sekuestruar 3 armë.
- Në lokacionin e dytë është sekuestruar 1 armë.
Sipas njoftimit zyrtar të Policisë, dy prej këtyre armëve posedonin leje përkatëse, ndërsa dy të tjera ishin pa leje.
I dyshuari për këtë rast është një shtetas kosovar i nacionalitetit serb. Autoritetet policore bënë të ditur se personi në fjalë dyshohet se aktualisht ndodhet jashtë territorit të Kosovës. Hetimet lidhur me këtë rast janë duke vijuar në bashkëpunim me organet e drejtësisë për zbardhjen e plotë të rrethanave të kanosjes.