Më 27 qershor 2026, Policia e Kosovës ka ndërhyrë në një vilë në vendin e njohur si “Livadhet e Kishës” në fshatin Jezerc, pas informacioneve për të shtëna me armë zjarri. Njësia e Hetimeve dhe Njësia Reaguese kanë dalë në vendin e ngjarjes, ku kanë kontaktuar pronarin e objektit dhe personat e pranishëm.
Gjatë kontrollit, tek i dyshuari me inicialet B.O. (30 vjeç) është gjetur dhe sekuestruar një pistoletë me një karikator që përmbante tre fishekë. Po ashtu, në vendin e ngjarjes janë gjetur dhe sekuestruar dy gëzhoja. I dyshuari ka pranuar para autoriteteve se kishte qëlluar dy herë me armën e zjarrit.
Në lidhje me rastin është njoftuar prokurori i shtetit, i cili ka autorizuar intervistimin e të dyshuarit. Ai do të hetohet për veprat penale “Mbajtja në pronësi, kontroll ose posedim të paautorizuar të armëve” dhe “Përdorimi i armës apo mjetit të rrezikshëm”. Pas përfundimit të procedurave, i dyshuari është liruar në procedurë të rregullt hetimore.