Tre senatorë demokratë amerikanë i kanë bërë thirrje presidentit Donald Trump të ndalojë prodhuesit kinezë të automjeteve të ndërtojnë makina në SHBA.
Tammy Baldwin, Elissa Slotkin dhe Chuck Schumer kanë kërkuar po ashtu që Trump të bllokojë importet e automjeteve kineze që montohen në Meksikë ose Kanada.
Kjo thirrje iu referohet deklaratave të Trump-it në janar në Detroit, ku ai tha se është i hapur ndaj mundësisë që kompanitë kineze të automobilave të ndërtojnë fabrika në SHBA.
Në letrën drejtuar Trump-it, senatorët shkruajnë: "Duhet të jemi të qartë se një ftesë për prodhuesit kinezë të automobilave për t’u vendosur në Shtetet e Bashkuara do t’u jepte atyre një avantazh ekonomik të pakapërcyeshëm, të cilin prodhuesit amerikanë nuk do të mund ta tejkalonin, dhe do të nxiste një krizë të sigurisë kombëtare që nuk do të mund të zhbëhej kurrë".
Letra u raportua fillimisht nga Reuters.