Presidenti i Serbisë, Aleksandar Vuçiç, paralajmëroi rritjen e kapaciteteve mbrojtëse të vendit përmes blerjes së pajisjeve të reja ushtarake, me fokus të veçantë te raketat kineze të tipit CM-400 dhe avionët luftarakë. Njoftimi u bë gjatë një stërvitjeje ushtarake të zhvilluar më 28 qershor në aeroportin ushtarak në Batajnicë dhe në poligonin Pasulanske Livade, me rastin e festës së Vidovdanit.
Gjatë ngjarjes u demonstruan aftësitë e njësive artilerike, të mbrojtjes kundërajrore, të aviacionit, tankeve, këmbësorisë dhe dronëve. Në aeroportin “Nënkolonel-pilot Millenko Pavlloviq”, Vuçiç vizitoi ekspozitën e armatimit, ku u shfaqën raketat CM-400, të blera nga Kina në muajin mars të këtij viti. Pavarësisht vërejtjeve nga Brukseli dhe Uashingtoni, Serbia po vijon thellimin e bashkëpunimit ushtarak me Kinën.
Të dhënat nga Instituti Ndërkombëtar për Kërkime të Paqes në Stokholm (SIPRI) tregojnë se në periudhën 2020–2024, Kina mbetet furnizuesi kryesor i Serbisë me 57% të totalit të armëve të importuara, e ndjekur nga Rusia me 20% dhe Franca me 7.4%.
Lidhur me aviacionin, Vuçiç konfirmoi se pilotët serbë kanë nisur trajnimet për avionët luftarakë francezë Rafale, të blerë në vitin 2024. Presidenti theksoi se pas dorëzimit të tyre, vendi planifikon të shtojë edhe avionë të tjerë luftarakë dhe avionë për trajnim, duke bërë të nevojshme rekrutimin e stafit shtesë. Megjithatë, Vuçiç ritheksoi se Serbia mbetet e përkushtuar ndaj politikës së saj të neutralitetit ushtarak.
Përditësime
Presidenti i Serbisë, Aleksandër Vuçiç, vlerësoi aftësitë e raketave kineze CM-400, duke i cilësuar si të avancuara. Në kuadër të zgjerimit të arsenalit ushtarak, ai theksoi nevojën për rekrutimin e pilotëve të rinj që do të operojnë me sistemet e reja të armatimit.