Pas një pauze që prej vitit 2022, kur zhvilloi ndeshjen e fundit në US Open, Serena Williams i rikthehet tenisit profesionist. Pjesëmarrja e saj në HSBC Championships në Queen’s Club të Londrës shërben si një mundësi për të testuar formën fizike përpara një pjesëmarrjeje të mundshme në Wimbledon.
Organizatorët e turneut konfirmuan se Williams ka marrë një ftesë speciale (wild card) për të garuar në kategorinë dyshe, ku do të bashkohet me 19-vjeçaren kanadeze Victoria Mboko. Ky binom është përshkruar nga organizatorët si një ndërthurje mes përvojës dhe energjisë së brezit të ri.
Presidentja e WTA, Valerie Camillo, vlerësoi rikthimin e saj, duke theksuar trashëgiminë e tenistes si një prej atleteve më të suksesshme të të gjitha kohërave. "Serena është një prej sportisteve më të mëdha të të gjitha kohërave, me një trashëgimi që shkon përtej fushës së tenisit", u shpreh Camillo.
Ndeshjet kualifikuese për gratë në Queen’s Club fillojnë më 6 qershor, ndërsa turneu zyrtar nis më 8 qershor. Për Williams, rikthimi në fushat me bar të këtij turneu tradicional përfaqëson një kapitull të ri në karrierën e saj të jashtëzakonshme, gjatë së cilës ajo ka fituar shtatë tituj individualë dhe gjashtë në dyshe në Wimbledon.