Xherdan Shaqiri, kapiten i Baselit, ka dhënë një intervistë të gjatë për gazetën zvicerane Blick, ku ka folur për karrierën e tij, ndjenjat në fushën e lojës dhe mundësinë e një ndryshimi skuadre. Në moshën 34-vjeçare, ai ndihet ende si një tinejxher në futboll dhe thekson se shijimi i lojës është kyç për performancën e tij të suksesshme.
Shaqiri udhëhoqi Baselin drejt titullit të kampionit dhe Kupës së Zvicrës në edicionin e kaluar. Edhe këtë sezon, skuadra është në garë për trofe, pavarësisht konkurrencës së fortë. Ai e vlerëson seriozitetin në fushë, por insiston se balanca mes argëtimit dhe përkushtimit është thelbësore. Si lider, Shaqiri është kërkues ndaj bashkëlojtarëve dhe pranon se presioni për fitore është i pranishëm te Baseli.
Gjatë intervistës, Shaqiri ka zbuluar përfshirjen e tij në klubin Rapperswil-Jona, që garon në kategorinë e dytë zvicerane dhe ku ai zotëron një pjesë të aksioneve. “Nuk jam përfshirë në Rapperswil pa arsye. Kemi plane të mëdha për klubin. Është një hap i mirë për të parë nga afër aspekte të ndryshme të drejtimit të një klubi, por gjithashtu përfshin shumë punë. Mundohem të përcjell çdo ndeshje në shtëpi, kur është e mundur”, ka deklaruar ai.
Shaqiri nuk e përjashton mundësinë e kalimit te ky klub. “Ndoshta do të luaj për Rapperswilin edhe vetë. Kjo qartë është një mundësi. Klubi do të jetë 100-vjeçar në vitin 2028. Tani e dini synimin tim për të ardhmen”, ka thënë duke qeshur. Ai po punon për të marrë licenca trajneri dhe është i sigurt se do të mbetet i lidhur me futbollin pas përfundimit të karrierës si lojtar.
Karriera e Shaqirit ka qenë e suksesshme në klube si Bayerni dhe Liverpuli, ku ka fituar trofe dhe ka mësuar kultura të ndryshme. Kjo përvojë, sipas tij, e ka ndihmuar të përshtatet lehtësisht me njerëz të profileve të ndryshme. Gjithashtu, ai planifikon të udhëtojë në Shtetet e Bashkuara të Amerikës verën e ardhshme për të ndjekur ndeshje të Kupës së Botës në futboll, ndoshta edhe finalen.