Shtetet e Bashkuara kanë deklaruar se kanë bërë pozicionimin më të madh të forcave ushtarake në Lindjen e Mesme brenda një gjenerate, në kuadër të operacionit “Tërbimi Epik”, që ka në shënjestër Iranin. Në këtë operacion janë përfshirë mbi 50.000 trupa ushtarake, 200 aeroplanë luftarakë, dy aeroplanmbajtëse dhe avionë bombardues me rreze të gjatë veprimi.
Lufta nisi më 28 shkurt në koordinim me Izraelin. Si pasojë, Iranit iu vranë udhëheqës të lartë dhe iu dëmtua rëndë infrastruktura ushtarake.
Në shenjë hakmarrjeje, Irani lëshoi dronë dhe raketa balistike drejt Izraelit dhe bazave ushtarake amerikane në Gjirin Persik, përfshirë Bahrejnin, Kuvajtin, Arabinë Saudite, Emiratet e Bashkuara Arabe dhe Omanin. Në disa nga këto vende, ambasadat amerikane janë mbyllur deri në njoftim të mëtejshëm.
Synimet e SHBA-së
Shtëpia e Bardhë ka bërë të ditur se nuk do të ndalet deri në arritjen e objektivave. Këto përfshijnë:
- T’i asgjësojë raketat e regjimit iranian;
- Ta shkatërrojë plotësisht marinën iraniane;
- T’ua bëjë të pamundur degëzimeve terroriste iraniane destabilizimin e botës;
- T’ia pamundësojë Iranit posedimin e armëve bërthamore.
Synimet lidhen kryesisht me kapacitetet ushtarake dhe udhëheqjen politike të Iranit në të ardhmen.
Zhvillimet e deritanishme
Ish-ambasadori amerikan për luftë kundër terrorizmit, Nathan Sales, në një intervistë për Radion Evropa e Lirë, tha se tregues afatshkurtër i suksesit të operacionit do të jetë ulja e shpejtë e intensitetit të sulmeve iraniane.
Shefi i Shtabit të Përgjithshëm të ushtrisë amerikane, gjenerali Dan Caine, pohoi se numri i raketave balistike të lëshuara nga Irani ka rënë për 86 për qind, ndërsa intensiteti i sulmeve me dronë është zvogëluar për 73 për qind krahasuar me ditët fillestare.
Përditësime
Presidenti i SHBA-së Donald Trump ka nisur fushatën ushtarake kundër Iranit dhe i është drejtuar popullit iranian.