Shtetet e Bashkuara kanë kryer një sulm ajror në Paqësor më 9 shkurt 2026, duke goditur një motoskaf që dyshohet se i përkiste trafikantëve të drogës. Si pasojë, dy persona humbën jetën, njoftoi Komanda e Përbashkët e SHBA-së për Amerikën e Jugut (SOUTHCOM) përmes platformës X.
Sulmi u drejtua nga komandanti i SOUTHCOM-it, gjenerali Francis L. Donovan, dhe u krye nga Joint Task Force Southern Spear. Inteligjenca amerikane konfirmoi se mjeti lundrues udhëtonte nëpër rrugë të njohura për trafik droge dhe drejtohej nga organizata të shpallura terroriste. Ky është sulmi i tretë ajror i konfirmuar që nga fillimi i vitit 2026.
Ky operacion është pjesë e një fushate ajrore të nisur në shtator 2025, që synon goditjen e rrjeteve të trafikut të drogës dhe ndërprerjen e rrugëve detare të kontrabandës në Paqësor. Deri tani, fushata ka lënë të paktën 130 viktima dhe ka shkatërruar 38 anije.
Një element i veçantë i këtij sulmi ishte raportimi për një të mbijetuar. SOUTHCOM njoftoi se Roja Bregdetare u njoftua menjëherë për të ndërmarrë një operacion kërkimi dhe shpëtimi për marinarin që arriti të mbijetojë bombardimin.