Shtetet e Bashkuara kanë hequr sanksionet ndaj disa entiteteve bjelloruse dhe ministrit të Financave të këtij shteti, ndërkaq Bjellorusia ka liruar 250 të burgosur, përfshirë të burgosurin politik Kim Samusenko dhe gazetaren Ekaterina Andreeva. Ky veprim erdhi pas takimit të 19 mars në Minsk midis i dërguarit të posaçëm amerikan John Coale dhe udhëheqësit bjellorus Aleksandr Lukashenko.
Coale njoftoi për heqjen e sanksioneve ndaj Belinvestbank, Bankës për Zhvillim të Bjellorusisë, si dhe të gjitha sanksioneve ndaj kompanive të potasit: Belaruskali, Belarusian Potash Company dhe Agrorozkvit. Ai e cilësoi lirimin e të burgosurve si “një hap të rëndësishëm humanitar dhe një dëshmi për përkushtimin e presidentit Donald Trump ndaj diplomacisë direkte dhe të vendosur”. Nga 250 të liruarit, 15 u dërguan në Lituani, ndërsa të tjerët u liruan brenda vendit.
Gruaja e Kim Samusenko, Alesya Zhitkova, shkroi në Facebook: “Kim Samusenko është i lirë!!! Detajet më vonë. Shumë faleminderit të gjithëve që mbështetën familjen tonë!”. Ekaterina Andreeva, gazetare e Belsat, u mbajt në burg për më shumë se pesë vjet për transmetimin drejtpërdrejtë të shtypjes policore ndaj një tubimi paqësor në nder të Roman Bandarenka, i cili u vra nga forcat e sigurisë. Familja e saj konfirmoi se ajo ndodhet tani në Lituani, sipas shërbimit bjellorus të Radios Evropa e Lirë.
Ky është sinjali i fundit i zbutjes së raporteve mes SHBA-së dhe Minskut që nga rikthimi i Donald Trump në Shtëpinë e Bardhë në janar 2025. Në dhjetor, 123 të burgosur u liruan në kuadër të një marrëveshjeje që përfshiu udhëheqësen e protestave të 2020-ës, Maryya Kalesnikava, laureatin e Çmimit Nobel Ales Byalyatski, si dhe qytetarë të disa shteteve të tjera.
Përditësime
Regjimi i Aleksandr Lukashenkos liroi sot 15 të burgosur të tjerë, duke çuar bilancin e të liruarve në 265 persona. Nga të liruarit e fundit, 13 ishin dënuar për akuza të lidhura me 'ekstremizmin', ndërsa 10 prej tyre janë gra. Paralelisht, administrata e Donald Trump po negocion me Minskun për një marrëveshje ekonomike në sektorin e plehrave bujqësore, konkretisht për plehrat potasike. Presidenti Trump konfirmoi zyrtarisht diskutimet për bashkëpunim në këtë sektor, duke shënuar një zhvillim të ri në strategjinë e shkrirjes së raporteve me Bjellorusinë.