Shtetet e Bashkuara janë të hapura për dialog me Korenë e Veriut pa asnjë kusht paraprak. Këtë e raporton agjencia Yonhap e Koresë së Jugut, duke cituar burime nga Shtëpia e Bardhë.
Ky qëndrim i Uashington-it vjen pas fjalimit të udhëheqësit Kim Jong-un, i cili mbylli një kongres disa-ditor të Partisë së Punëtorëve të Koresë. Aty, ai prezantoi objektivat politike dhe ushtarake për pesë vitet e ardhshme. Kim Jong-un tha se nuk ka arsye për marrëdhënie të tensionuara me SHBA-në, nëse Uashington-i ndalon politikën armiqësore ndaj vendit të tij. Ai përsëriti refuzimin e negociatave me Seul-in, por la hapur bisedimet me SHBA-në kundrejt njohjes së Koresë së Veriut si fuqi bërthamore.
Në të kaluarën, zyrtarët verikoreanë kanë refuzuar ofertat amerikane për denuklearizim, duke theksuar gatishmërinë për bisedime vetëm nëse SHBA-të heqin kërkesat për shpërbërjen e programit bërthamor. Gjatë mandatit të parë, presidenti Donald Trump u takua tre herë me Kim Jong-un për të ndaluar programin bërthamor, por samitet nuk sollën rezultat përfundimtar.
Sipas analistëve të cituar nga Associated Press, qëllimi i Kim Jong-un është lehtësimi i sanksioneve dhe njohja e Koresë së Veriut si fuqi bërthamore. Trump ka theksuar se ka marrëdhënie të mira me Kim-in.