Zyra e Drejtorit të Inteligjencës Kombëtare të SHBA publikoi më 18 mars 2026 raportin Vlerësimi Vjetor i Kërcënimeve 2026, ku paralajmëron se Ballkani Perëndimor mbetet zonë me tensione të shtuara politike dhe ndikime të jashtme. Raporti veçon rolin e Rusias në destabilizimin e rajonit.
Sipas dokumentit, lufta në Ukrainë ka thelluar ndarjet midis Perëndimit dhe Moskës, efekte që reflektohen në Ballkan. Rusia nxit paqëndrueshmëri midis Serbisë, të cilën e favorizon, dhe Kosovës. Gjithashtu, ajo mbështet ndarjen e entitetit serb Republika Sërpska nga Bosnja dhe Hercegovina.
Ndarje etnike dhe politike
Shërbimet amerikane të inteligjencës vlerësojnë se ndarjet etnike dhe politike në rajon mbeten të theksuara dhe përbëjnë rrezik për sigurinë, veçanërisht kur kombinohet me ndikimin e aktorëve të huaj. Ballkani Perëndimor përshkruhet si hapësirë ku përplasen interesat e fuqive të mëdha. Krizat ekzistuese dhe mosmarrëveshjet e pazgjidhura, si raportet midis Kosovës dhe Serbisë, si dhe marrëdhëniet e brendshme në Bosnje dhe Hercegovinë, mbeten burime kryesore paqëndrueshmërie.
Kërcënime më të gjera
Raporti paralajmëron për kërcënime në Evropë, si ndikimi politik, dezinformimi dhe përpjekjet për të cenuar arkitekturën e sigurisë, duke e konsideruar Ballkanin zonë të ndjeshme. Në nivel global, theksohen konkurrenca midis SHBA, Kinës dhe Rusias, sulmet kibernetike dhe teknologjitë destabilizuese.
Po ashtu, dokumenti veçon rreziqet nga terrorizmi, krimi i organizuar dhe përhapja e armëve të shkatërrimit në masë, të cilat sfidojnë sigurinë afatgjatë.