Dega e Aviacionit Detar të Marinës Amerikane ka bërë të ditur zhvillimin e raketës së re ajër-ajër me rreze ultra të gjatë veprimi, të quajtur AIM-424 Malice. Ky armatim është zhvilluar dhe prodhuar nga kompania amerikane Raytheon dhe fuqizohet nga një motor me lëndë djegëse të ngurtë.
Sipas të dhënave teknike, raketa ka një gjatësi prej 4.11 metrash, një diametër prej 0.34 metrash dhe një masë lëshimi prej rreth 680.4 kilogramësh. Ajo është e pajisur me një kokë luftarake me fragmentim të lartë shpërthyes. Fotografitë e publikuara nga platforma zyrtare e Departamentit të Mbrojtjes, DVIDS, më 22 gusht 2026, tregojnë raketën të montuar në dy modele të njohura të avionëve luftarakë: F-35C Lightning II dhe F/A-18E Super Hornet.
Ndërsa integrimi i plotë i raketës me këta avionë mbetet në fazë të pasqaruar, pamjet dëshmojnë se F/A-18E Super Hornet mund të mbajë të paktën katër raketa të tilla. Nga ana tjetër, F-35C mund t'i transportojë ato brenda ndarjeve të brendshme të armëve, çka i lejon avionit të ruajë profilin e tij të ulët të zbulueshmërisë gjatë misioneve luftarake.
Informacionet e disponueshme tregojnë se testimet e AIM-424 Malice kanë filluar që në dimrin e këtij viti. Roli i saj i saktë në inventarin e Marinës Amerikane nuk është konfirmuar ende, ndonëse ajo mund të përdoret për të plotësuar ose zëvendësuar pjesërisht raketën AIM-174. Për dallim nga AIM-174, e cila rrjedh nga teknologjia e raketave tokë-ajër SM-6, dizajni i AIM-424 Malice i ngjan më shumë raketave konvencionale ajër-ajër. Paralelisht, Forcat Ajrore të SHBA-së po zhvillojnë raketën AIM-260, për të cilën ende nuk janë bërë publike të dhëna zyrtare mbi performancën apo rrezen e veprimit.