Nicolas Guillou, gjykatësi francez 50-vjeçar, po përballet me vështirësi financiare pasi Shtetet e Bashkuara e kanë përfshirë në listën e sanksioneve. Ai kryesoi panelin e Gjykatës Ndërkombëtare Penale që lëshoi urdhër-arrestit ndaj kryeministrit izraelit Benjamin Netanyahu në vitin 2024.
Në një intervistë për France 24, Guillou deklaroi se kartat e tij krediti janë bllokuar dhe nuk mund të kryejë më porosi apo rezervime online. Ai e përshkroi situatën si një "kthim 30 vjet prapa" në një botë dixhitale, duke theksuar se në Francë sistemet e pagesave kontrollohen nga rrjetet amerikane. Guillou, ish-anëtar i Gjykatës Speciale për Kosovën, shprehet skeptik se sanksionet do të hiqen gjatë mandatit të dytë të presidentit amerikan Donald Trump.
Presidenti francez Emmanuel Macron ka ndërhyrë duke dërguar shtatë letra zyrtare në autoritetet amerikane për heqjen e sanksioneve, por nuk ka marrë përgjigje pozitive. Një burim në Elysee njoftoi se Parisi vazhdon përpjekjet diplomatike për të zgjidhur çështjen.
Guillou paralajmëron për pasoja më të gjera: "Nëse prokurorët kanë frikë të ndjekin penalisht, nëse avokatët kanë frikë të mbrojnë, nëse gjyqtarët kanë frikë të gjykojnë, nëse parlamentarët druhen të miratojnë ligje dhe ministrat kanë frikë t’i zbatojnë, atëherë nuk ka më demokraci." Ai e sheh këtë si precedent të rrezikshëm për sistemin e drejtësisë dhe funksionimin e shtetit ligjor.