Departamenti i Shtetit amerikan njoftoi se të enjten thirri në takim ambasadorin e Irakut, Nazar Al-Khirullah. Zëvendëssekretari i Shtetit, Christopher Landau, shprehu para tij dënimin e fortë të qeverisë amerikane për sulmet e rënda terroriste nga grupe të armatosura të mbështetura nga Irani ndaj interesave amerikane në Irak.
Zëdhënësi Tommy Pigott deklaroi se Shtetet e Bashkuara nuk do të tolerojnë sulme ndaj interesave të tyre dhe presin që qeveria irakiane të ndërmarrë menjëherë masa për shpërbërjen e grupeve të milicive të lidhura me Iranin. Ai përmendi një pritë më 8 prill ndaj diplomatëve amerikanë në Bagdad, por nuk dha hollësi të tjera mbi rrethanat e saj.
Iraku është përfshirë në konfliktin mes Shteteve të Bashkuara, Izraelit dhe Iranit për shkak të sulmeve të vazhdueshme ndaj interesave amerikane, veçanërisht në Ambasadën amerikane në Bagdad. Grupet e armatosura proiraniane njoftuan të mërkurën se do të pezullojnë sulmet për dy javë, pas shpalljes së armëpushimit midis Shteteve të Bashkuara dhe Iranit.
Pigott njohu përpjekjet e forcave të sigurisë irakiane për t’iu përgjigjur sulmeve, por theksoi dështimin e qeverisë irakiane për t’i parandaluar ato. Ai shtoi se marrëdhëniet midis SHBA dhe Irakut janë ndikuar negativisht nga fakti që disa elementë të lidhur me qeverinë irakiane ofrojnë mbulim politik, financiar dhe operacional për milicitë.