Shtetet e Bashkuara kanë rritur praninë ushtarake pranë Iranit, duke zhvendosur mbi 150 avionë luftarakë në baza ajrore në Evropë dhe Lindjen e Mesme. Këto lëvizje bazohen në të dhënat e gjurmimit të fluturimeve dhe imazhet satelitore të analizuara nga Washington Post, pas përfundimit pa marrëveshje të raundit të dytë të bisedimeve bërthamore më 17 shkurt.
Prania aktuale e forcave amerikane në rajon është ndër më të mëdhatë në mbi dy dekada, që nga periudha para Luftës së Irakut në 2003. Ekspertët vlerësojnë se ky mobilizim tejkalon atë që i parapriu sulmeve ndaj programit bërthamor iranian në qershor të vitit të kaluar dhe tregon përgatitje për një fushatë ajrore shumëditore pa pushtim tokësor.
Dhjetëra avionë shtesë ndodhen në aeroplanmbajtësen USS Gerald R. Ford, e vërejtur pranë brigjeve të Kretës më 23 shkurt. Kjo është aeroplanmbajtësja e dytë në rajon, krahas USS Abraham Lincoln, duke përqendruar rreth një të tretën e flotës aktive amerikane në Lindjen e Mesme. Avionë si F-22 Stealth janë vendosur në baza në jug të Izraelit, ndërsa të tjerë në Muwaffaq Salti në Jordan, Lakenheath në Mbretërinë e Bashkuar dhe aeroportin e Chania-s në Kretë.
Ky përforcim vjen pas paralajmërimeve të Presidentit Donald Trump, i cili ka kërcënuar se do të sulmojë Iranin nëse nuk arrihet marrëveshje për frenimin e programit bërthamor. Zyrtarët iranianë kanë lënë të hapur mundësinë e një marrëveshjeje, por kanë theksuar se ajo kërkon kohë.
Dana Struhl, ish-zëvendësndihmëssekretare e mbrojtjes për Lindjen e Mesme, deklaroi se niveli i fuqisë së akumuluar lejon ekzekutimin e çdo vendimi të Trump-it, nga fushata të zgjatura deri te sulme të synuara. Mark Kansian, këshilltar në Qendrën për Studime Strategjike dhe Ndërkombëtare, vlerësoi se një fushatë ajrore njëjavore do të kërkonte më shumë mjete. Gregory Bru, analist i Iranit, theksoi pozicionimin në Evropën Lindore për të ruajtur avantazhin strategjik jashtë rrezes së raketave iraniane.
Zyrtarët e Pentagon-it pranuan fluksin e forcave, por nuk dhanë detaje për arsye sigurie operacionale.
Përditësime
The Times of Israel raporton vendosjen e avionëve F-22 Stealth në një bazë ajrore në jug të Izraelit.
Gjurmimet e fluturimeve tregojnë se shumica janë avionë transporti dhe furnizimi me karburant, pasi avionët luftarakë zakonisht çaktivizojnë transponderët.