Shefi i misionit të UNMIK-ut në Kosovë, Peter Due, zhvilloi një takim me përfaqësues të komunitetit diplomatik dhe organizatave ndërkombëtare për të shënuar Ditën Ndërkombëtare të Paqeruajtësve të Kombeve të Bashkuara.
Takimi u mbajt në selinë e UNMIK-ut dhe u fokusua te tema e këtij viti, "Investoni në Paqe". Ky organizim shërbeu si një mundësi për të reflektuar mbi rolin jetësor të operacioneve të paqes.
Gjatë eventit, të pranishmit u njohën me punën dhe prioritetet aktuale të UNMIK-ut, duke përfshirë iniciativat për ndërtimin e besimit dhe përpjekjet më të gjera të Ekipit të OKB-së në Kosovë.
Në deklaratën zyrtare, UNMIK shprehu mirënjohjen për partneritetin dhe mbështetjen e vazhdueshme të komunitetit ndërkombëtar, duke nënvizuar rolin e tyre në avancimin e paqes, stabilitetit, ndërtimit të besimit dhe dialogut në Kosovë.