Të dielën, në rrugën "Don Shtjefën Kurti" në Prishtinë, toka e përpiu asfaltin, duke shkaktuar ndërprerje të energjisë elektrike dhe furnizimit me ujë në disa zona të kryeqytetit.
Kjo ngjarje ngriti alarm te qytetarët. Kryetari i Prishtinës, Përparim Rama, deklaroi se prioritet kryesor për komunën është restaurimi i rrymës dhe ujit.
Ai shpjegoi se ekipi i tij ka qenë në vendngjarje deri në orët e vona të mbrëmjes për të sanuar problemin. Të gjitha ekipet komunale, përfshirë Drejtorinë e Sigurisë dhe Emergjencave, kanë ndihmuar në vlerësimin e situatës.
"Shihet një problem i madh strukturor. Videoja tregon kolaps të pinave që duhej ta mbrojnë zonën. Ndërtuesit thanë se duket sikur ka pasur rrjedhje uji, por shkaku nuk dihet ende saktësisht", u shpreh Rama në emisionin "Ora Shtatë" të Klan Kosova.
Dëmet shtrihen në pjesë të ndryshme të qytetit, pasi nën rrugë kalojnë linja të energjisë elektrike. Rama tha se ka biseduar me ekipe të KOSTT-së, të cilat premtojnë lëshimin e shpejtë të një linje të paprekur.
Ai theksoi nevojën për të identifikuar patjetër shkaktarin e këtij rreziku të madh.