Ish-deputeti Ervin Salianji ka qenë sot në terren në Dragostunjë të Librazhdit, pranë urës së dëmtuar në aksin rrugor Elbasan-Korçë. Në një video të publikuar në rrjetet sociale, ai shpjegon se dëmtimi i strukturës ka ardhur për shkak të ndërhyrjeve në shtratin e lumit për përfitime private, duke minuar themelet dhe thërrmuar betonin mbajtës.
Sipas Salianjit, kjo nuk është fatkeqësi natyrore, por pasojë e korrupsionit dhe babëzisë në menaxhimin e infrastrukturës. Ai thekson se grykësia ka lejuar shkatërrimin e lumenjve, duke lënë qytetarët pa siguri dhe infrastrukturë të përshtatshme. Aksi Elbasan-Korçë është kthyer në torturë për lëvizjen e qytetarëve.
Dëmtimi ka bllokuar qarkullimin drejt juglindjes për dy ditë. Salianji vlerëson se çdo metër i dëmtuar është provë e korrupsionit dhe çdo urë e rrezikuar është dëshmi e dështimit të qeverisjes. Ai kërkon përgjegjësi nga autoritetet dhe siguri për qytetarët, duke thënë se Shqipëria ka nevojë për përgjegjësi, jo propagandë.