Një sherr i dhunshëm mes disa personave është regjistruar rreth orës 23:00 të ditës së premte, në lagjen nr. 3 të qytetit të Sarandës, në zonën e njohur si “Ekualipsi”. Sipas informacioneve paraprake, konflikti ka nisur për motive të dobëta, duke përshkallëzuar në përleshje fizike me grushte dhe sende të forta.
Menjëherë pas njoftimit, forca të shumta të Policisë së Sarandës dhe të FNSH kanë mbërritur në vendin e ngjarjes për të vendosur rendin. Si rezultat i ndërhyrjes, janë shoqëruar në komisariat 6 shtetas të përfshirë në konflikt.
Ndërkohë, bëhet e ditur se disa prej personave të dëmtuar gjatë përleshjes janë paraqitur në ambientet e spitalit të qytetit për të marrë ndihmën e nevojshme mjekësore. Autoritetet policore kanë nisur hetimet dhe po punojnë për dokumentimin e plotë të rrethanave të ngjarjes.