Presidentja e Kosovës, Justina Shiroka Pula, mori pjesë në ceremoninë e shënimit të 103-vjetorit të Republikës së Turqisë. Në fjalën e saj, ajo u përcolli urimet popullit turk dhe institucioneve të Republikës së Turqisë, si dhe vlerësoi marrëdhëniet ndërmjet dy vendeve.
Shiroka Pula kujtoi themelimin e Republikës së Turqisë nën udhëheqjen e Mustafa Kemal Atatürkut. Ajo e cilësoi këtë datë si moment përcaktues në historinë e popullit turk dhe në rrugëtimin e tij drejt shtetit modern.
Presidentja e cilësoi Turqinë partner strategjik dhe aleat të rëndësishëm të Kosovës, me të cilën, sipas saj, Kosova ka miqësi të qëndrueshme dhe interesa të përbashkëta. Ajo vlerësoi mbështetjen e Turqisë në periudha të rëndësishme për Kosovën, duke përmendur pjesëmarrjen e saj në ndërhyrjen e NATO-s më 1999, njohjen e pavarësisë së Kosovës dhe kontributin në sigurimin e njohjeve ndërkombëtare.
Shiroka Pula veçoi bashkëpunimin në fushën e sigurisë dhe mbrojtjes, veçanërisht për ngritjen e kapaciteteve mbrojtëse të Kosovës. Ajo përmendi gjithashtu komunitetin turk në Kosovë dhe mërgatën shqiptare në Turqi si ura lidhëse ndërmjet dy vendeve.
Në përfundim, presidentja shprehu bindjen se Kosova dhe Turqia do ta thellojnë partneritetin në të gjitha fushat me interes të përbashkët, mbi bazën e besimit dhe bashkëpunimit të ndërsjellë.