Në shtëpinë e shkrimtarit izraelit Etgar Keret në Tel Aviv sundon një qetësi e pazakontë. Ai ka çinstaluar nga telefoni celular aplikacionin Tzofar, të cilin miliona izraelitë e përdorin për njoftimet e raketave. “Probabiliteti që të bie një raketë është i ulët dhe mundësia për t’u goditur personalisht është jashtëzakonisht e vogël. Nuk dua të hyj në gjendje kolektive paniku”, shpjegon Keret me një buzëqeshje të qetë, pavarësisht pakënaqësive të fqinjëve.
Kjo javë ka rikthyer alarme dhe tension midis Gazës dhe Izraelit. Keret rikujton bisedën e tij me gazetarët në tetor të vitit të kaluar, kur tha se “konflikti nuk ka mbaruar ende” dhe nuk do të ndalonte pas armëpushimit.
Ai kritikon qeverisjen izraelite: “Janë dy vjet e gjysmë që Benjamin Netanyahu vendos objektiva të parealizueshme, si fitore totale mbi Hamas-in dhe kushte armëpushimi të pamundura. Kështu mban popullin në tension duke premtuar një të ardhme të përkryer. Por kur problemi nuk zgjidhet realisht, lufta kthehet.”
Keret e përshkruan situatën si një film që nuk mbaron kurrë. Njerëzit jetojnë në pritje të lajmeve të reja: sulme, atentate ose njoftime politike. “Është një eksperiment psikologjik. Miliona njerëz shpresojnë për fundin e luftës, por gabojnë. Nuk ka plan të qartë, as ushtarak, as diplomatik.”
Sa i përket Iran-it, ai nuk e ndryshon mendimin: “Është një kërcënim i madh për Izraelin dhe botën. Neutralizimi është i nevojshëm, por mënyra se si vepron Trump nuk ka kuptim.” Keret thekson se lufta në Gaza dhe tensioni me Iran-in krijojnë një mjegull pa strategji pas krizës.