Një ngjarje ka shkaktuar panik mbrëmjen e së mërkurës, më 5 gusht 2026, në zonën e Laprakës, ku një automjet ka shpërthyer dhe është përfshirë nga flakët gjatë kohës që ishte në lëvizje. Incidenti është regjistruar rreth orës 22:10 në rrugën “Dritan Hoxha”.
Sipas njoftimit zyrtar të Policisë së Tiranës, dyshohet se shkaku i marrjes flakë të mjetit ka qenë një defekt teknik. Automjeti dyshohet se ka qenë i pajisur me impiant gazi, gjë që ka çuar në shpërthimin e papritur. Drejtuesi i automjetit, shtetasi D. L., 61 vjeç, fatmirësisht nuk ka pësuar asnjë lëndim fizik.
Autoritetet policore kanë konfirmuar se nga ky incident janë shkaktuar vetëm dëme materiale. Një grup hetimor ndodhet në vendngjarje dhe po punon për zbardhjen dhe dokumentimin e plotë të rrethanave të këtij rasti.
Përditësime
Sipas dëshmive të banorëve, zhurma e shpërthimit të automjetit në Laprakë është dëgjuar deri në zonën e Zogut të Zi. Policia e Tiranës ka konfirmuar incidentin dhe po vijon hetimet për të përcaktuar nëse shkaku ka qenë një defekt teknik.