Një mjet shpërthyes i improvizuar është aktivizuar mbrëmjen e së shtunës në një restorant në qendër të Moskës, duke shkaktuar vdekjen e të paktën 3 personave dhe plagosjen e 21 të tjerëve. Ngjarja u regjistrua rreth orës 20:00 në sheshin Kudrinskaja, në restorantin Balzi Rossi, i cili ishte mbyllur për një aktivitet privat.
Sipas Komitetit Kombëtar Antiterrorizëm të Rusisë, mes viktimave të identifikuara deri tani janë gruaja që dyshohet se solli mjetin shpërthyes, një roje sigurie që u përpoq ta ndalonte hyrjen e saj, si dhe një nga mysafirët e restorantit. Autoritetet konfirmuan se shpërthimi erdhi si pasojë e një bombe artizanale, duke përjashtuar mundësinë e një aksidenti në kuzhinë, pistë kjo që ishte raportuar fillimisht nga disa kanale në Telegram.
Ndërkohë që hetimet janë duke u zhvilluar, mediat raportojnë se restoranti po priste një festë private ku dyshohet se ndodhej komandanti i Forcave Hapësinore Ajrore të Rusisë, gjenerali Aleksandr Chaiko. Deri në këto momente, autoritetet ruse nuk kanë dhënë detaje zyrtare nëse gjenerali ka qenë objektivi i sulmit apo nëse është prekur nga shpërthimi.
Spekulimet mbi motivet mbeten të hapura, me disa burime që sugjerojnë se bomba mund të jetë aktivizuar nga distanca ose se personi që mbante mjetin shpërthyes mund të mos ketë qenë në dijeni të natyrës së tij. Vëzhguesit ndërkombëtarë e lidhin ngjarjen me një seri atentatesh të mëparshme ndaj figurave ushtarake dhe mbështetësve të Kremlinit që kanë ndodhur pas fillimit të pushtimit të Ukrainës në vitin 2022.
Përditësime
Autoritetet ruse kanë përditësuar bilancin e shpërthimit në restorantin "Balzi Rossi" në Moskë: numri i viktimave ka shkuar në 5, ndërsa i të plagosurve në 19. Hetuesit konfirmuan se mes të vdekurve është Danil Perendri, dhëndri i gjeneralit Aleksandr Chaiko, ndërsa bashkëshortja e tij, Maria Perendri, ndodhet në gjendje të rëndë. Gjenerali Chaiko ishte duke festuar 55-vjetorin e lindjes kur ndodhi sulmi. Ekspertët e antiterrorit bënë të ditur se pajisja shpërthyese ishte modifikuar me sfera metalike për të shtuar dëmet. Sipas dëshmive, një grua e panjohur hyri në restorant duke pretenduar se po dorëzonte një dhuratë për gjeneralin.
Hetuesit kanë identifikuar viktimën si Daniil Perendry, 30 vjeç, ish-lojtar profesionist i hokejit dhe dhëndri i gjeneralit Aleksandr Chaiko. Bashkëshortja e tij, Maria Perendry, 25 vjeçe, ndodhet në gjendje kritike për jetën. Burime hetimore konfirmojnë se në momentin e shpërthimit në restorant ndodhej një delegacion i nivelit të lartë, përfshirë politikanë, oficerë ushtarakë dhe pjesëtarë të shërbimeve të inteligjencës. Gjenerali Aleksandr Chaiko është një figurë e lakuar për rolin e tij në luftën në Ukrainë, ku përballet me akuza për krime lufte gjatë operacioneve në Buça.
Ministria e Jashtme e Rusisë ka akuzuar zyrtarisht Ukrainën për shpërthimin në një restorant në Moskë, duke e cilësuar atë si një akt të kryer nga forcat e Zelenskyt. Hetuesit konfirmuan se gjenerali Aleksandr Chaiko i ka shpëtuar atentatit pa lëndime. Provat e gjetura në vendngjarje, përfshirë mbishkrimin 'Aleksandr 55', tregojnë se shpërthimi ndodhi gjatë ceremonisë së ditëlindjes së tij.
Ministria e Jashtme e Rusisë e ka klasifikuar zyrtarisht shpërthimin si një akt terrorizmi, duke akuzuar atë që e quajti 'banda terroriste e Zelenskyt'. Restoranti 'Balzi Rossi' ndodhet brenda një prej 'Shtatë Motrave', rrokaqiejve ikonikë të Moskës. Burimet e inteligjencës konfirmojnë se gjenerali Aleksandr Chaiko, i cili po festonte ditëlindjen në momentin e sulmit, ka drejtuar më parë operacionin për pushtimin e Kievit, duke e bërë atë një objektiv të profilit të lartë.