Kryeministri në detyrë Albin Kurti njoftoi se Shqipe Mjekiqi, ish-nënkryetare e Lidhjes Demokratike të Kosovës, është bashkuar me ekipin e tij si kryeministër. Ajo do të kontribuojë me ekspertizën e saj në fushën e politikës së jashtme dhe marrëdhënieve ndërkombëtare.
Kurti shkroi se me Mjekiqin kanë diskutuar nevojat e Kosovës në rrugën drejt anëtarësimit në Bashkimin Evropian dhe NATO, arritjet socio-ekonomike, vlerat demokratike, zhvillimet politike në vend dhe në rajon, si dhe situatën e sigurisë.
Shqipe Mjekiqi ka përfunduar studimet e doktoraturës në Shkenca Politike në Trinity College Dublin dhe masterin në politikat e Bashkimit Evropian në London School of Economics. Ajo ka përvojë të gjatë në institucionet publike të Kosovës në fushën e integrimit evropian dhe çështjeve të sigurisë. Aktualisht është profesor asistent në Kolegjin UBT dhe konsulente në projekte zhvillimi dhe reformash.